【foodpanda 外賣速遞美食初體驗】要知道西貢好多人住喺荒山野嶺，去最近有野食嘅地方要行 15+ 分鐘再搭車先到。早前知道 Foodpanda 進駐西貢，真心興奮，以後嗌外賣唔止得 3 間 Pizza 店 + 嗰間唔好味嘅馬來西亞菜。
記得以前喺舊公司同事有嗌過，等左成兩個鐘先送黎，啲野食凍晒又送漏野，即管試下新進駐西貢後會否有改善？不過我試左幾次嗌 Foodpanda 就唔太順利喇，好在今日終於都嗌到。
首先係入極都話搵唔到我條村，但收過廣告仲問過明知佢送黎，唯有 PM 客服問問，佢叫我求其入個 Work 嘅門牌再喺備註寫返正確地址用住先。終於可以成功落單，點知到埋單時話我冇輸入地址…入乜都話我冇入野，再次 PM 客服，過兩日通知已修復好。以為終於落到單？入完信用卡，話通訊錯誤…過左陣見修復左，入埋而家做緊嘅信用卡優惠碼，要收 SMS 認證，但按左重新發送 5 次、等左好耐都冇收到，又再 PM 客服問，過左大半個鐘頭，終於一口氣 Send 夠 10 個 SMS 黎囉…好彩夠早、間餐廳未收工。
幾經辛苦終於嗌到野食，話 25 分鐘送到，真係 22 分鐘就送左黎，黎到仲係熱辣辣夠新鮮嘅，呢個抵讚返，送貨員態度都好好，客服亦都有盡力幫忙，算佢啦，下次可以再俾機會。希望會陸續修復好問題，令更多西貢街坊可以幫襯到啦。
Search